जेष्ठ १६ काठमाण्डौं । नेपाली राष्ट्रिय फुटबल टोलीले आज लाओस विरुद्ध मैत्रीपूर्ण खेल पनि बराबरीमा चित्त बुझाएको छ ।
पहिलो हाफ्मा कमजोर प्रदर्शन गरेको नेपालले दोस्रो हाफ्मा आक्रामक खेल्दै ७६ औं मिनेटमा बिशाल राईको गोल मार्फत अग्रता लिएको थियो ।
तर त्यसको दुई मिनेट पछि नै घरेलु टोलीले एक गोल फर्काए पछि खेल बराबरीमा रोकिएको हो ।
लाओसको भियन्तान स्थित राष्ट्रिय रंगाशालामा खेल भएको थियो ।
नेपालका कप्तान अनील गुरुङलाई बेन्चमा राखेर प्रशिक्षक कोजीले पहिलो टिम उतारेका थिए ।
जापानी प्रशिक्षक कोजी ग्योतोकुले नेपाली टोलीको जिम्मेवारी समालेयता नेपालको यो पहिलो औपचारिक खेल हो ।
यस अघि बगबन्धु गोल्ड कप, भारतमा सम्पन्न साग प्रतियोगीता जीतेको नेपाल मलेशियाको २२ वर्ष मुनिको उमेर समुहसँगको मैत्रीपूर्ण खेलमा भने १/१ गोलको बराबरीमा रोकिएको थियो ।
विश्वकप छनोट र एसियन कप छनोटबाट बाहिरीसकेको नेपालले औपचारिक फुटबल प्रतियोगिताका रुपमा भने अर्को वर्ष बंगलादेशमा साफ च्याम्पियनसिप खेल्नेछ ।
