काठमाण्डौ १६ जेठ । प्रधानमन्त्री केपी शर्मा ओलीले सरकारले सार्वजनिक गरेको आगामी आर्थिक वर्षको बजेटले सबै क्षेत्रलाई उत्साहित बनाएको दाबी गर्नुभएको छ ।
नीति तथा कार्यक्रमअनुसार नै बजेट आएको भन्दै उहाँले सरकारले बजेटको प्रभावकारी कार्यान्वयन गर्नेमा शंका नगर्न आग्रह गर्नुभयो ।
पर्यटन मन्त्रालयले आज काठमाडौंमा गरेको कार्यक्रममा प्रधानमन्त्री ओलीले मलुकको विकासलाई तिब्रता दिने लक्ष्यसहित बजेट आएको बताउनुभयो । मुलुकको आर्थिक विकासप्रति सरकार दृढ संकल्पित छ भन्ने कुरा बजेटबाट प्रष्ट भएको उहाँको भनाइ थियो ।
नीति, कार्यक्रम र बजेटले नेपालको विकासलाई तिव्रताका साथ अगाडि बढाउने कुरामा नयाँ दृष्टिकोण पेश गरेको र यसले हरेक क्षेत्रलाई उत्साहित बनाएको उहाँले वताउनुभयो ।
यसैविच प्रधानमन्त्री ओलीले सरकारले ल्याएको बजेटको प्रतिरक्षा गर्न आफ्ना सांसदहरुलाई निर्देशन दिनुभएको छ ।
संसद भवन नयाँ बानेश्वरमा आज बसेको एमाले संसदीय दलको बैठकलाई सम्बोधन गर्दै प्रधानमन्त्री ओलीले बजेटलाई दिल खोलेर समर्थन गर्न आग्रह गर्नुभयो ।
विपक्षीहरुले वितरणमुखी भनेर विरोधमात्रै गरेको गुनासो गर्दै ओलीले बजेटमा कुन कुरामा असहमति हो भन्ने नखुलाई भ्रममात्रै फैलाउन खोजिएको आरोप लगाउनुभयो ।
शिक्षा, स्वास्थ्य र विकास योजनाका लागि बजेट छुट्याइएको दाबी गर्दै प्रधानमन्त्री ओलीले पैसा पोको पारेर राख्ने नभइ वितरण गर्नुपर्ने धारणा राख्नुभयो ।
सांसदले ३ करोड पाए भनेर भ्रम फैलाइएको भन्दै प्रधानमन्त्री ओलीले सांसदहरुलाई विकास निर्माणमा सहभागी बनाउन रकम छुट्याइएको तर्क गर्नुभयो । बजेट कार्यान्वयन चुनौतीपूर्ण रहेको भन्ने आरोपको खण्डन गर्दै उहाँले देश बनाउने काम नै चुनौतीपुर्ण रहेको जिकिर गर्नुभयो ।
