काठमाण्डौ १५ जेठ । कोपा अमेरिका फुटबलको तयारीमा रहेको उरुग्वे मैत्रीपूर्ण फुटबलमा विजयी भएको छ भने गएको वर्षको च्याम्पियन चिली पराजित भएको छ ।
आज बिहान भएको खेलमा उरुग्वेले ट्रिनिडाड एण्ड टोबाकोलाई ३–१ ले हराएको हो । उरुग्वेको जितमा एडिसन काभानीले दुई तथा माटिएर वेकिनोले एक गोल गरे । ट्रिनिडाड एण्ड टोबाकोका लागि जोमल विलियम्सले एक गोल फर्काए । सातौं मिनेटमा विलियम्सले गोल गर्दै टोबाकोलाई सुरुवाती अग्रता दिलाएका थिए । तर घरेलु मैदानमा भएको खेलमा फ्रेन्च क्लब पेरिस सेन्ट जर्मेनका काभानीले २६ औं मिनेटमा उरुग्वेका लागि बराबरी गोल फर्काए ।
३९ औं मिनेटमा व्यक्तिगत दोस्रो गोल गर्दै काभानीले उरुग्वेलाई २–१ को अग्रता दिलाए । ५२ औं मिनेटमा वेकिनोले एक गोल गरेपछि उरुग्वेको अग्रता ३–१ मा पुग्यो । त्यसपछि खेलमा दुवै तर्फबाट गोल हुन सकेन र उरुग्वे विजयी भयो । यो खेलमा बार्सिलोनाका स्ट्राइकर लुइस स्वारेज भने चोटका कारण खेलेका थिएनन् ।
अर्को खेलमा गएको वर्ष कोपा अमेरिकाको उपाधि जितेको चिली जमैकासँग पराजित भयो । जमैकाले चिलीलाई उसकै घरेलु मैदानमा २–१ ले हरायो । चिलीलाई हराउन जमैकाका क्लेटन डोनल्डसनले ३६ तथा जोएल ग्रान्टले ५३ औं मिनेटमा गोल गरे । चिलीका लागि ८२ औं मिनेटमा निकोलस कास्टियोले एक गोल फर्काए । चिलीका एलेक्स सान्चेजले गोल गर्ने मौका गुमाए ।
