काठमाडौ १५ जेठ ।
इन्डियन प्रिमियर लिग आइपिएल क्रिकेटको उपाधिका लागि रोयल च्यालेन्जर्स बैंग्लोर र सनराइजर्स हैदरावादबीच प्रतिस्पर्धा हुने भएको छ ।
गएराति दिल्लीमा भएको दोस्रो क्वालिफाएरमा गुजरात लाइन्सलाई चार विकेटले पराजित गर्दै हैदरावादले बैंग्लोरसँगको फाइनल भिडान्त तय गरेको हो ।
गुजरातले दिएको एक सय ६३ रनको चुनौती हैदरावादले १९ दशमलव २ ओभरमा ६ विकेट गुमाएर पूरा गर्यो । हैदरावादका लागि कप्तान डेविड वार्नरले पारी सम्हालेर जित दिलाए ।
वार्नर ५८ बलमा ११ चौका र तीन छक्काको मद्दतमा ९३ रनमा नटआउट रहे । यस्तै मोइसिस हेनरिक्सले ६ बलमा ११ तथा नमन ओझाले ८ बलमा १० रन बनाए ।
गुजरातका डवेन ब्राभो र शिविल कौशिकले दुई दुई विकेट लिए । यसअघि पहिले ब्याटिङ गरेको गुजरातले सात विकेटको क्षतिमा एक सय ६२ रन बनाएका थिए ।
हारसँगै गुजरातले फाइनलमा पुग्ने दोस्रो मौका पनि गुमाएको छ । पहिलो क्वालिफाएरमा पराजित भएर गुजरात एलिमिनेटरको विजेता हैदरावादसँग दोस्रो क्वालिफाएर खेलेको थियो ।
पहिलो क्वालिफाएरमा गुजरातलाई हराएको बैंग्लोर र दोस्रो क्वालिफाएरको विजेता हैदरावादबिच आइतबार उपाधिका लागि प्रतिस्पर्धा हुनेछ ।
