काठमाण्डौ ,१४ जेठ ।
नेकपा माओवादी केन्द्रका अध्यक्ष पुष्पकमल दाहाल प्रचण्डले मुलुक र जनताको अपेक्षा पुरा गर्नका लागि क्रान्तिकारी माओवादीबिचमा एकता भएको बताउनुभएको छ ।
क्रान्तिकारी पत्रकार संघ र क्रान्तिकारी पत्रकार महासंघले आज माओवादी केन्द्रको पार्टी कार्यालय पेरिसडाँडामा आयोजना गरेको अभिमुखीकरण कार्यक्रमलाई सम्बोधन गर्दै उहाँले माओवादी एकताले जनताको पक्षमा उभार पैदा गरेको बताउनुभयो । प्रचण्डले अबको केही दिनभित्रै गाउँ गाउँमा पुगेर जनतालाई एकीकृत गर्ने र पार्टीमा संगठित गरिने पनि बताउनुभयो ।
केन्द्रका नेता रामबहादुर थापाले जनताको आवश्यकता, चाहना र राष्ट्रिय आवश्यकतालाई पुरा गर्ने लक्ष्यका साथ पार्टी एकीकरण भएको बताउनुभयो ।
त्यस्तै केन्द्रका प्रवक्ता पम्फा भुसाल, क्रान्तिकारी पत्रकार सङ्घका संस्थापक खिलबहादुर भण्डारी, ओम शर्मालगायतले वर्तमान सन्दर्भमा क्रान्तिकारी पत्रकारको भूमिका प्रभावकारी एवम् गतिशील हुनुपर्ने बताउनुभएको थियो ।
