काठमाडौ १२ जेठ ।
स्याङ्जाको मिर्मीस्थित कालीगण्डकी ‘ए’ जलविद्युत आयोजनामा समस्या देखिएपछि मर्मतका लागि एक सात परियोजना बन्द गरिएको छ ।
सुरुङबाट पेनस्टक हुँदै टर्वाइनसम्म पानी पठाउने पाइपको मुख्यद्वारमा समस्या देखिएपछि आज बिहानदेखि उत्पादन बन्द गरी मर्मत सुरु गरिएको आयोजना प्रमुख श्रीरामराज पाण्डेले जानकारी दिनुभयो ।
कुल १४४ मेगावाट क्षमताको उक्त आयोजनाबाट ९० मेगावाट विद्युत् उत्पादन गर्दै आएको थियो । एउटा युनिट मर्मत गर्न समपूर्ण युनिट बन्द गर्नुपर्दा समस्या भएको पाण्डले बताउनु भयो ।
यसैबीच आयोजना बन्द भएपछि औपचारिक रुपमा विद्युत कटौती नगरिएपनि साविकको तालिका भन्दा केही तलमाथि हुन सक्ने विद्युत प्राधिकरणले जनाएको छ ।
आफूहरु सकेसम्म विद्युत्भार कटौतीको समय बढाउने पक्षमा नभएपनि अनौपचारिक रुपमा केही समय तलमाथि भने हुन सक्ने नेपाल विद्युत् प्राधिकरण भारप्रेषण केन्द्रका प्रमुख भुवनकुमार खत्रीले बताउनु भयो ।
प्राधिकरणले अहिले दैनिक औसतमा दश घन्टा विद्युत्भार कटौती गर्दै आएको छ भने नदीमा जलप्रवाह बढेका कारण केही दिनभित्र विद्युत्भार कटौती केही समय कम गर्ने जनाएको छ ।
