काठमाडौ ,४ जेठ ।
जिल्ला प्रशासन कार्यालय काठमाडौंले सुरक्षा संवेदनशीलतालाई मध्यनजर गर्दै प्रधानमन्त्री निवास बालुवाटार आसपासका महत्वपूर्ण स्थानमा निषेधित क्षेत्र घोषणा गरेको छ ।
प्रधानमन्त्री निवास बालुवाटारदेखि दक्षिणतर्फ इटालियन चोक र उत्तरतर्फ पवित्र वर्कशपसम्म, सभामुखको निवासदेखि पश्चिम दक्षिणतर्फ गैरीधारा जाने बाटोको एक सय मिटरसम्मको क्षेत्रलाई निषेधित क्षेत्र घोषणा गरेको प्रमुख जिल्ला अधिकारी रामकृष्ण सुवेदीले जानकारी दिनुभयो ।
यस्तै प्रधानन्यायाधीशको निवास बालुवाटारदेखि पश्चिम लाजिम्पाटसम्म एक सय मिटर र नेपाल राष्ट्र बैंक वालुवाटार चोकदेखि पूर्व एक सय मिटरसम्म निषेधित क्षेत्रमा अर्को आदेश नआएसम्मका लागि निषेधित क्षेत्र तोकिएको गरेको प्रशासन कार्यलयले जनाएको छ ।
स्थानीय प्रशासन ऐन, २०२८ को दफा ६ (३) बमोजिम निषेधित क्षेत्र तोकिएको र उल्लेखित सूचनाको अवज्ञा गर्दै कसैले कुनै कार्य गरेमा कानुन बमोजिम कारबाही हुने प्रमुख जिल्ला अधिकारी सुवेदीले बताउनु भयो ।
