काठमाण्डौ ,३० वैशाख ।
सरकारले मिर्गौला रोगीको निस्शुल्क डायलोसिस गराउने निर्णय गरेको छ ।
मन्त्रिपरिषदको आजको बैठकले आगामी दिनमा सबै मिर्गौला रोगीको उपचारार्थ डायलोसिस खर्च निःशुल्क गराउने निर्णय गरेको सरकारका प्रवक्ता सूचना तथा सञ्चारमन्त्री शेरधन राईले जानकारी दिनुभयो ।
मृगौलापीडित साहित्यकार दाहाल यज्ञनिधिलगायतले दुई दिनअघि प्रधानमन्त्री केपी शर्मा ओलीलाई भेटेर डायलोसिस निस्शुल्क गराउन तथा मृगौला प्रत्यारोपणका लागि आर्थिक सहयोगको माग गरेको थियो ।
यसैबीच सरकारले प्रधानमन्त्रीको अध्यक्षतामा राष्ट्रिय सूचना तथा प्रविधि परिषद् गठन पनि गरेको छ ।
यस्तै, बैठकले बेरुजु फछ्र्योट मूल्याङ्कन र अनुगमन समितिको सदस्य सचिवमा तनहुँका कृष्णनाथ खनाललाई नियुक्त गर्ने निर्णय गरेको छ ।
प्रधानमन्त्रीको हालै सम्पन्न मित्रराष्ट्र भारत र चीनको औपचारिक भ्रमणका सन्दर्भमा भएका सम्झौता, समझदारी तथा सहमतिका विषयहरुलाई प्रभावकारी रुपमा कार्यान्वयन गर्नका लागि परराष्ट्र सचिवको संयोजकत्वमा दुई अलग समिति गठन गरिएको छ ।
