बैशाख २८, काठमाण्डौ ।
नयाँ नेतृत्व चयनका लागि निर्वाचन गर्न विश्व फुटबलको सर्वोच्व संस्था फिफाले अखिल नेपाल फुटबल संघ एन्फालाई निर्देशन दिएको छ ।
फिफाको इथिक्स कमिटी र अपिल कमिटीले तात्कालिन अध्यक्ष गणेश थापालाई कारबाही गरेपनि विधान अनुसार साधारण सभा मार्फत नयाँ नेतृत्व चयन गर्न निर्देशन दिएको हो ।
फिफाले पत्र मार्फत आगामी जेठ १० गते भित्र निलम्बनमा परेका तीन जना उपाध्यक्ष र एक सदस्यलाई समेत पुर्नबहाली गर्न एन्फालाई आग्रह गरेको छ ।
कार्यसमिति बैठकमा लगातार ४ पटक अनुपस्थित रहेको भन्दै एन्फा उपाध्यक्षत्रय कर्माछिरिङ शेर्पा, विजयनारायण मानन्धर र किशोर राई तथा सदस्य पंकज नेम्वाङलाई एन्फाले निलम्बन गरेको थियो ।
एन्फाका कार्यकारी अधिकृत तथा प्रवक्ता इन्द्रमान तुलाधारले फिफाको निर्देशनात्मक पत्र प्राप्त भएको जानकारी दिनुभयो । एन्फाको विवादलाई सकारात्मक रुपमा टुङग्याउन तयार रहेको बताउदै तुलाधरले विधान सच्चाएर अघि बढ्ने बताउनुभयो ।
यता राष्ट्रिय खेलकुद परिषद राखेपका सदस्य सचिव केशव कुमार विष्टले फिफाको पत्रबारे थप अध्ययन गरेर एन्फालाई निर्देशन दिने बताउनुभयो ।
कारबाही गरिएका पदाधिकारीलाई पुर्नस्थापना र साधारण सभा मार्फत नयाँ नेतृत्वको चुनाव गर्न भोली सम्ममा एन्फालाई निर्देशन दिने सदस्य सचिव विष्टको भनाई छ ।
