काठमाडौं, २७ वैशाख ।
सत्ता गठबन्धन दलका नेताहरुले नै सरकारको नीति तथा कार्यक्रमको आलोचना गरेका छन् ।
सस्तो लोकप्रियताबाट प्रेरित भएर सरकारले आगामी आर्थिक बर्षको नीति तथा कार्यक्रम ल्याएको भन्दै एमाओवादी नेता वर्षमान पुनले सरकारको आलोचना गर्नुभयो ।
राजधानीमा आज आयोजित कार्यक्रममा बोल्दै पूर्वअर्थमन्त्री समेत रहनुभएको पुनले एमालेले एमाओवादीसँग गरेको ९ बुँदे सहमतिलाई सरकारको नीति तथा कार्यक्रममा नसमेटिएको गुनासो गर्नुभयो ।
यस्तै, कांग्रेस नेता चिनकाजी श्रेष्ठले नीति तथा कार्यक्रम सरकारले कसैसँग सल्लाह नगरी रातारात ल्याएको आरोप लगाउनु भयो ।
कार्यक्रममा सद्भावनाका नेता लक्ष्मणलाल कर्णले संविधानबमोजिमको संरचना नै खडा नभइ नीति तथा कार्यक्रम कार्यान्वयन नहुने धारणा राखे ।
सरकारका प्रवक्ता एवं सन्चारमन्त्री शेरधन राईले भने यो नीति तथा कार्यक्रम जनमुखी रहेको र सन्तुलित विकासको अवधारणालाई ध्यानमा राखेर ल्याइएको दाबी गर्नुभयो ।
