काठमाडौ ८ वैशाख । दोस्रो चरणको आन्दोलनको स्वरुपबारे कुनै निर्णय गर्न नसकेको मधेशी मोर्चा तथा विभिन्न जनजाति आवद्ध दल सम्मिलित संघिय गठबन्धनको बैठक आज पनि बस्दैछ ।
राजधानीस्थित फोरम नेपालको कार्यलयमा बिहान ११ बजेपछि बस्ने बैठकले आगामी आन्दोलनको खाका तयार पार्ने बताइएको छ ।
आजको बैठकबाट राजधानी केन्दित आन्दोलन गर्ने गरी खाका सार्वजनिक गरिने संघीय समाजवादी फोरम अध्यक्ष उपेन्द्र यादवले जानकारी दिनु भयो ।
आफूहरुको माग सम्बोधन गर्नमा सरकारले चासो नदेखाएको भन्दै असन्तुष्ट गठबन्धन दलले राजधानी केन्द्रित आन्दोलन गर्ने तयारी गरेको छ ।
आन्दोलनको स्वरुप प्रदर्शन र धर्ना मात्रै गर्ने या सिंहदरबार प्रवेशमा अवरोध सहित अन्य कार्यक्रम पनि गर्ने भन्नेमा नेताहरुबीच मतभेद रहेको बताईएको छ ।
विगत ६ महिनादेखि आन्दोलनमा रहेका मधेशी मोर्चाले तराईमा एक प्रदेश सहित विभिन्न माग अघि सार्दै आएका छन् ।
