खोटाङ ,३० चैत ।
खोटाङको काभ्रेपानीमा आज बिहान भएको यात्रु बस दुर्घटनामा २२ जनाको मत्यु भएको छ । दुर्घटनामा अन्य २३ जना घाइते भएका छन् ।
दिक्तेलबजारबाट काठमाडौं तर्फ आउँदै गरेको बा २ ख ६३७६ नम्बरको बस विहान ८ बजे काभ्रेपानीको बर्खेटार भन्ने स्थानमा दुर्घटना भएको प्रहरीले जनाएको छ ।
बस सडकबाट करिव ५ सय मिटर तल खसेको थियो । दुर्घटनामा चालक अर्जुन उप्रेती सहित २२ जनाको मृत्यु भएको उद्धारमा संलग्न नेपाली सेनाको शेरगण मुडे ब्यारेकका प्रमुख सेनानी मदन न्यौपानेले जानकारी दिनुभयो ।
घाइते मध्ये गम्भिर अवस्थाका २० जनालाई उपचारका लागि नेपाली सेनाको हेलिकप्टरवाट काठमाण्डौं ल्याउने तयारी भएको न्यौपानेले बताउनु भयो । अन्यको स्थानीय स्वास्थ्य चौकीमा उपचार भइरहेको छ ।
मृतकमा ७ जना महिला र १६ जना पुरुष रहेका छन । घाइते मध्ये अधिकांशको अवस्था गम्भिर रहेको उद्धारमा खटिएका अधिकारीहरुले बताएका छन् । बसमा ४२ जना यात्रु सवार थिए ।
नेपाली सेना, प्रहरी र स्थानीयबासी उद्धार कार्यमा खटिएका छन् । दुर्घटनास्थल सदरमुकामवाट करिव ४ घण्टाको दुरीमा पर्दछ ।
