काठमाण्डौ, २९ चैत्र । राष्ट्रपति विद्यादेवी भण्डारीले स्वास्थ्य क्षेत्रमा उल्लेखनीय प्रगति हासिल भए पनि विपन्न वर्गका जनता त्यो प्रगतिबाट विमुख रहेको बताउनु भएको छ ।
काठमाडौंमा सुरु भएको भएको स्वास्थ्य तथा जनसंख्या वैज्ञानिकहरुको दोस्रो राष्ट्रिय सम्मेलनको उद्घाटन गर्दै राष्ट्रपति भण्डारीले स्वास्थ्य सेवाको क्षेत्रमा भएको विकास गाउँ तहसम्म विस्तार नभएका कारण विपन्न वर्ग अझैपनि गुणस्तरीय स्वास्थ्य सेवा पाउनबाट वञ्चित रहेको बताउनु भयो ।
राज्यले लगानी गरेका स्वास्थ्य संस्था गाउँ तहसम्म फैलिएपनि तिनको सेवा प्रभावकारी नरहेको र यहि कारण ग्रामिण भेगका महिलाले सुत्केरी हुँदा ज्यानै गुमाउनुपर्ने पीडादायी अवस्था रहेकोमा जोड दिनुभयो ।
ग्रामिण महिलाहरुले प्रभावकारी र गुणस्तरीय सेवा पाउन नसकेको तथा निजी क्षेत्रको स्वास्थ्य सेवा महङ्गो भएको विषयमा सरकारले गम्भीर ध्यान दिन आवश्यक रहेको उहाँको भनाई छ ।
