काठमाण्डौ, २९ चैत्र ।
नेपाली कांग्रेसका सभापति शेरबहादुर देउवाले प्रधानमन्त्रीको अध्यक्षतामा गठित उच्चस्तरीय संघीयता कार्यान्वयन समितिको औचित्य नभएको बताउनुभएको छ ।
स्थानीय शान्ति समिति खोटाङ र सर्वदलीय सम्मिलित प्रतिनिधिमण्डलको आज आफ्नै निवास बुढानिलकण्ठमा ज्ञापनपत्र बुझ्दै सभापति देउवाले सरकारले हालै गठन गरेको संघीयता कार्यान्वयन समितिको औचित्य नभएको बताउनुभएको हो । उहाँले सरकारले गठन गरेको समितिबारे आफूलाई जानकारीसमेत नभएको बताउनुभयो ।
सभापति देउवाले संविधान कार्यान्वयनका लागि राजनीतिक दलहरुबीच सहकार्य हुनुपर्ने बताउँदै उहाँले संविधान कार्यान्वयन नहुँदा राजनीतिक स्थायित्व हुन नसकेको भन्दै सबैखाले संक्रमणकालको अन्त्यका लागि संविधान कार्यान्वयन जरुरी रहेकोमा जोड दिनुभयो ।
कुनै एक पार्टीको निर्णयबाट मात्र मुलुकले निकास पाउन नसक्ने भन्दै उहाँले सबै राजनीतिक दलको सहकार्य आवश्यक रहेको पनि बताउनुभयो । सभापति देउवाले आर्थिक क्षेत्रको विकास बिना मुलुकको विकास सम्भव नहुने बताउँदै राजनीतिक स्थायित्वपछि विकासले गति लिने समेत बताउनुभयो ।
शान्ति समिति सम्मिलित सर्वदलीय प्रतिनिधिमण्डलले भने खोटाङको विकास निर्माणबारे ध्यानाकर्षण गराउँदै सभापति देउवासमक्ष ८ बुँदे ज्ञापनपत्र बुझाएको छ ।
