चैत्र २९ काठमाण्डौं । सत्तारुढ एकीकृत माओवादी सहित विभिन्न दलका चार वटा ट्रेड युनियनले आधिकारीक ट्रेड युनियनको चुनाव रोक्न माग गर्दै आन्दोलन जारी राखेका छन् ।
आज पनि बिहानै देखि सिंहदरबारमा ती संगठनका नेता सहित सदस्यहरु धर्ना शुरु गरेका थिए ।
धर्नामा बसेका आन्दोलनकारी कर्मचारीलाई पक्राउ गरेर साझ रिहा गरिएको जनाईएको छ । सरकारले सिंहदरबार भित्र ठूलो मात्रामा परिचालन गर्नुका साथै सर्वसाधारणलाई सिंहदरबार प्रवेशमा समेत कडाई गरेको छ । उता निर्वाचनको तालिका अनुसार आज ट्रेड युनियनहरुले मनोनयन गर्दै छन् । चुनाव भने आगामी १० गते हुने छ ।
सल्लाह नगरी निर्वाचनको मिति तोकिएको तथा कम्तीमा २० प्रतिशत कोटा समावेशी हुनु पर्ने माग राखेर कर्मचारीहरु आन्दोलित भएका हुन् ।
सवारी चालक संघका अध्यक्ष शरण गुरुङ र नेपाल राष्ट्रिय कर्मचारी महासंघका निजामति संगठनका केन्द्रीय सदस्य गणेशलाल महर्जनलाई अझै रिहा नगरिएको सो संगठनले जनाएको छ । नेपाल राष्ट्रिय कर्मचारी महासंका अध्यक्ष मोहनमान स्वांरले आफूहरुको आन्दोलन जारी रहने बताउनु भयो ।
“सरकारले कर्मचारी ट्रेड युनियनका नेताहरुलाई थुनेर आधिकारीक ट्रेड युनियनको चुनाव गर्न खोज्दै छ , यो कस्तो निरकुशता हो ?” चार वटै ट्रेड युनियनका महासचिव प्रवाश शाहले भन्नु भयो ।
आफूहरुसँग सल्लाह नै नगरी विधि र प्रक्रियाविपरीत ट्रेड युनियनको निर्वाचन प्रक्रिया अघि बढाइएको भन्दै नेपाल राष्ट्रिय कर्मचारी संगठन, मधेसी निजामति कर्मचारी मञ्च, राष्ट्रसेवक कर्मचारी संगठन र राष्ट्रिय कर्मचारी संगठनले चरणवद्ध आन्दोलन गर्दै आएका छन् ।
यसैबीच नेपाल राष्ट्रिय कर्मचारी संगठन नेपाल आयल निगमले पनि कर्मचारीहरुको जारी आन्दोलनमा ऐक्यवद्धता जनाएको छ ।
संगठनका अध्यक्ष गोपाल चन्द्र राईले कर्मचारी ट्रेड युनियनको चुनावमा सरकारले हैकमवादी प्रवृति देखाएर सीमित संगठनको मात्र प्रभावमा चुनाव गराउन खोजेको भन्दै यस्तो प्रवृति मान्य नहुने चेतावनी दिनु भयो ।
