झापा, २५ चैत्र ।
मनाङ–मर्स्याङ्दी क्लबलाई पराजित गर्दै त्रिभुवन आर्मी क्लब रमपम झापा गोल्डकप आमन्त्रण फुटबल प्रतियोगिताको फाइनलमा प्रवेश गरेको छ ।
झापाको डोमालाल राजवंशी रंगशालामा विहीबार भएको दोस्रो सेमिफाइनलमा मनाङलाई १–० ले हराउँदै आर्मी उपाधिनजिक पुगेको हो ।
खेलको ११औं मिनेटमा अमित तामाङले प्रहार गरेकोे फ्रिकिकले जाली चुमेपछि आर्मी विजयी भएको हो । डि एरियाबाहिर पाएको फ्रिकिकमा तामाङको प्रहार नै निर्णायक गोलमा परिणत भयो ।
मनाङले अधिकांश समय खेललाई दबाबमा राखेपनि गोल गर्न भने असफल रह्यो । आर्मीका विश्व अधिकारी खेलको ‘म्यान अफ द म्याच’ घोषित भए ।
आर्मीले अब उपाधिका लागि आगामी शनिबार हुने फाइनलमा आयोजक झापा–११ को सामना गर्नेछ ।
विजेताले ६ लाख रुपैयाँ र उपविजेताले टोलीले तीन लाख रुपैयाँ जित्नेछन् । प्रतियोगितामा भारतका दुईसहित १० ओटा टिमको सहभागी भएका थिए ।
