काठमाडौं, चैत्र २५
सद्भावना पार्टीका सह–अध्यक्ष लक्ष्मणलाल कर्णले ओली नेतृत्वको सरकार पूर्ण रूपमा असफल भएको भन्दै तत्काल राजीनामाको माग गरेका छन् ।
राजधानीमा आज आयोजित एक कार्यक्रममा बोल्दै उनले भने, ‘जनतालाई सास्ती दिने बाहेक यो सरकारले केही नयाँ काम गरेको छैन, समग्रमा यो सरकार असफल भएको छ, नैतिकताका आधारमा पनि तत्काल राजीनामा दिनुपर्छ ।’
प्रधानमन्त्री ओलीले हाँस्यव्यङ्ग गर्न बाहेक केही गर्न नजानेको आरोप लगाउँदै नेता कर्णले एक हप्ताभित्र सहमति नगरे बैशाख पहिलो साताभित्रै आन्दोलन गर्ने चेतावनी दिए ।
उनले भने, ‘चैत्र मसान्तसम्मको समय हामीले दिएका थियौं तर आजसम्म सरकारले कुनै चासो देखाएको छैन, अब बैशाखबाट हामी आन्दोलन छेड्छौं ।’ अब हुने आन्दोलन मधेशमा मात्रै केन्द्रित नभएर हिमाल र पहाडमासमेत हुने उनले जानकारी दिए ।
आफूहरूले आन्दोलन स्थगित गरेको महिना दिन बित्दा पनि जनताले सास्ती व्यहोर्नु परिरहेको उल्लेख गर्दै वर्तमान सरकार आफैँ कालोबजारी, माफिया र कमिसनखोरमा लागि परेको आरोप समेत लगाए । आन्दोलनको सुरुवात काठमाडौंबाट गर्ने तय भइसकेको भन्दै यसपटक नाकामा धर्ना दिने कार्यक्रम नभएको उनको दाबी गरेका छन् ।
