काठमाडौं, चैत्र २४
आउँदो बुधबारबाट नयाँ वर्ष विक्रम सम्वत् २०७३ साल सुरु हुँदै छ । उक्त नयाँ वर्षमा केही चाड पर्व र दिवस प्राय शनिबार नै परेकाले सार्वजनिक बिदाको संख्यासमेत घटेको छ । पर्व, दिवस, जात्रा, जयन्ती, महान् चाड दशैं, तिहारका बिदा केही जुधेको र केही शनिबारको दिन परेकाले बिदाको संख्या घट्न गएको हो । २०७३ सालमा शनिबारसहित एक सय दुई वटा सार्वजनिक बिदा परेका छन् ।
तर, कतिपय चाड र दिवस पनि शनिबार नै परेकाले बिदा घट्ने भएको नेपाल पञ्चाङ्ग निर्णायक समितिका अध्यक्ष प्रा.डा. रामचन्द्र गौतमले बताए । ‘केही चाडपर्व एकैदिन परेको र केही शनिबार परेकाले सार्वजनिक बिदा घट्ने भएको हो ।’ उनले भने ।
२०७३ सालमा सबैलाई मिल्ने सार्वजनिक बिदामा सात दिन शनिबारै परेको छ । यो वर्ष ५२ वटा शनिबार परेका छन् । यो वर्ष उपत्यकाको हकमा थप चार र महिलाका लागि थप तीन वटा बिदा रहेका छन् ।
२५ फागुनमा पर्ने महिला दिवसको बिदा सबैलाई दिइएको छ । ११ बैशाखमा दिँदै आएको लोकतन्त्र दिवसको बिदा असोज ३ मा जारी गरिएको संविधान दिवसका लागि दिइएको छ ।
