काठमाडौं, चैत्र २३
नेपाली कांग्रेसको संसदीय दलको नेता चयनका लागि आजबाट प्रक्रिया सुरु हुने भएको छ । आज उम्मेदवारी दर्ता हुँदैछ । संसदीय दलको नेताका लागि उम्मेदवारी दर्ताका लागि बिहान ९ बजेदेखि मध्यान्ह १२ बजेसम्मको समय निर्धारण गरिएको छ । निर्वाचन समितिकाअनुसार उम्मेदवारको पहिलो चरणको नामावली प्रकाशन साढे १२ गरिनेछ ।
यस्तै उम्मेदवारको दरखास्त उपर दाबी विरोधका लागि साढे १२ बजेदेखि १ बजेसम्मको समय निर्धारण गरिएको छ । उम्मेदवारको दोश्रो नामावली प्रकाशन दिउँसो साढे १ बजे गरिनेछ । दलको नेताको उम्मेदवारको अन्तिम नामावली प्रकाशन दिउँसो २ बजे गरिने संयोजक रमेश रिजालले जानकारी दिएका छन् ।
अन्तिम नामावली प्रकाशनपछि भोलि बुधबार बिहान ११ बजेदेखि अपरान्ह २ बजेसम्म संसदीय दलको कार्यालय सिंहदरबारमा मतदान हुनेछ । यसपटक संसदीय दलको नेताको निर्वाचन विद्युतीय माध्यमबाट गरिने छ । दलको नेताका लागि सभापति शेरबहादुर देउवा र वरिष्ठ नेता रामचन्द्र पौडेलले प्रतिस्पर्धा गर्ने भएका छन् । संसदीय दलको कार्यसमितिको निर्वाचन भने चैत्र २६ गते हुने छ ।
