काठमाडौ ,२१ चैत्र ।
स्पेनिस ला लिगा अन्तर्गत गएराति सम्पन्न खेलमा रियल मड्रिडले बार्सिलोनालाई पराजित गरेको छ । रियल मड्रिडले बार्सालाई उसैको मैदान नाउक्याम्पमा २–१ ले हराएको हो ।
५६ औं मिनेटमा जेरार्ड पिकेले गोल गर्दै घरेलु टोली बार्सिलोनालाई सुरुवाती अग्रता दिलाए । ६२ औं मिनेटमा करिम बेन्जिमाले रियलका लागि बराबरी गोल फर्काए ।
८३ औं मिनेटमा कप्तान सर्जियो रामोस दोहोरो पहेँलो कार्ड खाँदै मैदानबाट बाहिरिएपछि रियल १० खेलाडीमा सीमित भयो । तर त्यसको दुई मिनेटपछि नै क्रिष्टियानो रोनाल्डोले रियलका लागि गोल गरे र २–१ को जित दिलाए ।
यो सिजन समग्रमा एक सय तीन गोल गरेका बार्सिलोनाका लियोनल मेस्सी, लुइस स्वारेज र नेइमारले खेलमा एउटा पनि गोल गर्न सकेनन् ।
जितपछि तेस्रो स्थानको रियलको ३१ खेलबाट ६९ अंक भएको छ । शीर्ष स्थानको बार्सिलोनाको ७६ अंक छ ।
