काठमाडौ २० चैत्र । नेकपा (क्रान्तिकारी माओवादी) का उपाध्यक्ष सीपी गजुरेलले माओवादीहरुबीच एकता हुन आवश्यक भएपनि नवसंशोधनवादी र प्रतिक्रान्तिकारीको पिछलग्गु हुने अवस्था आउन नहुने बताउनु भएको छ ।
काठमाण्डौको संवाद डबलीमा भएको सिन्धुली–काठमाडौं सम्पर्क मञ्चको तेस्रो सम्मेलनमा सो धारणा रा्ख्नु भएको हो ।
क्रान्तिकारी माओवादी पार्टीको नौ दिनदेखि चलिरहेको केन्द्रीय समितिको बैठकमा बोल्ने हरेक सदस्यहरुले क्रान्तिका निम्ति माओवादी शक्तिहरुबीच एकता हुनुपर्ने कुरामा जोड दिएको बताउँदै गजुरेलले भन्नुभयो “सिद्धान्तबिनाको एकता नवसंशोधनवादी र प्रतिक्रान्तिकारीको पिछलग्गु हुने र सो एकता हस्यास्पद हुन्छ ।”
गजुरेलले पार्टी एकताका लागि चलिरहेको छलफलमा एकीकृत माओवादी मात्र नभएर सबै क्रान्तिकारी कम्युनिष्टसंग एकता गर्न कसैको विरोध नरहेको बताउनु भयो ।
उहाँले एकीकृत नेकपा माओवादीसँग एकता हुन्छ या हुँदैन भन्ने कुरा पार्टीको केन्द्रीय समितिको बैठक सम्पन्नपछि मात्रै निश्चित हुने भएपनि एमाओवादी त्यति गम्भीर नभएकोले एकता नहुने सम्भावना देखिएको बताउनु भयो ।
