धरान/घरमा सुतिरहेकी १२ वर्षिया बालिकालाई रातको समयमा बलात्कार गर्न खोज्ने धरान–२७ पट्नालीका २५ वर्षे सुजन माझीलाई प्रहरीले पक्राउ गरेको छ ।
रातको २ बजे सुतिरहेकी बालिकालाई माझीले कोठामा प्रवेश गरी मुख थुनेर बलात्कार गर्न खोजेका थिए । अरुलाई भनेमा मारिदिन्छु भन्दै उनले जबर्जजस्ती करणी गर्न खोज्दा बालिका चिच्याए पछि घरका अरु मान्छेले थाह पाएका थिए । हल्लाखल्ला गर्दा सुजन माझी भागेका थिए ।
पीडितले घटनाबाट त्रसित भई प्रहरीमा उजुरी दिएका थिए । उजुरी पश्चात खोजतलास गर्दा काठमाण्डौं बुढानिलाकण्ठबाट नेपाल प्रहरीले चैत्र १७ गते पक्राउ गरेको छ । पक्राउ परेका माझीलाई चैत्र १८ गते नै इलाका प्रहरी कार्यालय धरानमा ल्याई कार्बाही अगाडि बढाएको प्रहरी नायब उपरीक्षक (डिएसपी) ढकेन्द्र खतिवडाले जानकारी दिनु भएको छ ।
पक्राउ परेका उनलाई इलाका प्रहरी कार्यालय धरानले म्याद थप गर्दै आवश्यक अनुसन्धान सुरु गरेको छ । करिव ६ वर्ष अघि पनि एक महिलामाथि बलात्कार तथा सुन लुटपाट गरेर गाउमै मिलापत्र गरेका माझी यसपटक भने प्रहरीबाट उम्किन सकेनन् ।
इलाका प्रहरी कार्यालय धरानका प्रमुख डिएसपी खतिवडाले पक्राउ परेका माझीलाई जबरजस्ती करणी अन्तर्गत कारबाही अगाडि बढाइने जानकारी दिनुभयो । माझीले बलात्कार गरेको ठहरेमा मुलुकी ऐन जर्वजस्ती करणी महलको धारा १४ अनुसार ८ देखि १२ वर्षसम्म जेल सजायको पाउने र पीडित बालिकालार्ई उचित क्षतिपूर्तिसमेत दिनु पर्ने कानुनी प्रावधान रहेको छ ।
