काठमाडौं, चैत्र १६
अन्तर्राष्ट्रिय फुटबल प्रतियोगितामा प्रतिस्पर्धा गर्न नेपाली जुनियर फुटबल टोली जापान पुगेको छ । आउँदो अप्रिलको पहिलो साता जापानमा हुने १२ वर्षमुनिको अन्तर्राष्ट्रिय फुटबल प्रतियोगितामा नेपाली टोलीले प्रतिस्पर्धा गर्ने भएको हो ।
उक्त प्रतियोगितामा सहभागिता जनाउन नेपालबाट प्रसन्न श्रेष्ठ, प्रकाश नेपाली, निराजन थापा, मनोज नेपाली, साकार थापा, अनमोलसिंह थापा, अविरल थापा, मनोज जलारी, रोशन थापा, कुशल परियार, प्रमेश गुरुङ, अस्मित गोर्खाली, विशाल थापामगर र प्रशिक्षक शम्भु केसी रहेका छन् ।
टोकियो फुटबल संघ र फुटबल क्लब कोपा पुमा तोरेरोस जापानको संयुक्त आयोजनामा अप्रिल १, २ र ३ मा कोपा पुमा तोरेरोस–२०१६ अन्तर्राष्ट्रिय बाल फुटबल प्रतियोगिता हुँदैछ । विगत पाँच वर्षदेखि जापानमा हुँदै आइरहेको उक्त प्रतियोगितामा नेपाली टीमको पहिलो पटक प्रतिस्पर्धा गर्न लागेको हो ।
प्रतियोगितामा नेपाली टीमलाई सहभागी गराउन सहयोग समितिको लागि शरदकुमार गौचन नेतृत्वको टोलीले पहल गर्दै आएको थियो । जुन सहयोगी समूहको उपसंयोजक ओमप्रकाश तुलाचन, सदस्यहरू बसन्त गौचनलगायत रहेका छन् । नेपालबाट आएको जुनियर फुटबल टोलीलाई नारिता विमानस्थलमा पनि खादा लगाएर स्वागत गरिएको थियो । नेपालबाट आउने खेलाडीहरूको लागि जापानमा आवास, भोजन र यातायातको व्यवस्था आयोजक समितिबाट हुने भए पनि नेपालबाट जापानसम्मको हवाई टिकटको व्यवस्था नहुने भएकाले जापानबासी नेपालीहरूबाट सहकार्यको अपेक्षा गर्दै सहयोग समितिले विभिन्न ढंगले श्रोत जुटाउन लागि परेका छन् ।
