काठमाडौ ११ चैत्र ।
पूर्वपश्चिम राजमार्ग अन्तर्गत सुनसरीको पकलीमा आज बिहान भएको ट्याक्टर दुर्घटनामा दुई जनाको मृत्यु भएको छ । अन्य दुईजना घाइते भएका छन् ।
स १ त ३२ ८८ नम्बरको ट्याक्टर आज बिहान इटहरी उपमहानगरपालिका १९ स्थित सशस्त्र प्रहरी बेसक्याम्प नजिकैको कल्भर्टमा ठोक्किएर दुर्घटना भएको प्रहरीले जनाएको छ ।
दुर्घटनामा चितवन नारायणगढका २५ वर्षीय गौरव राय क्षेत्रीको मृत्यु भएको इलाका प्रहरी कार्यालय पकलीका सई राजन पौडेलले जानकारी दिनुभयो । मृतक अर्का एक पुरुषको भने परिचय खुल्न सकेको छैन ।
घाइतेहरु भोजपुर रानीबासका ट्याक्टर चालक २१ वर्षीय प्रताप राई र उदयपुरका रोशन राईको अहिले धरानस्थित बीपी कोइराला स्वास्थ्य विज्ञान प्रतिष्ठानमा उपचार भइरहेको छ ।
ट्याक्टर उदयपुरको रामपुर ठोकसिला मैनामैनीबाट गएराति ९ बजे बाँस लिएर इटहरीका लागि ट्याक्टर छुटेको थियो । रातभरी चलाउँदा अनिधो भएर दुर्घटना भएको हुनसक्ने प्रहरीको प्रारम्भिक अनुमान छ ।
