काठमाडौ ४ चैत्र । भारतमा जारी टी ट्वान्टी विश्वकप क्रिकेटमा सुपर टेन अन्तरगत समुह एकको खेलमा आज अफ्गानिस्तान र श्रीलंकाबीच प्रतिस्पर्धा हुदैछ ।
विश्वकपमा अफ्गानिस्तान पहिलो चोटी समुह चरण पार गर्दै सुपर टेनमा पुग्न सफल भएको हो । प्रतियोगितामा श्रीलंकालाई बलियो टोलीका रुपमा लिइन्छ ।
यसअघि हिजो सम्पन्न खेलमा इंग्ल्याण्डलाई ६ विकेटले पराजित गर्दै वेष्ट इन्डिजले विजयी सुरुवात गरेको छ ।
इंग्ल्याण्डले प्रस्तुत गरेको एक सय ८३ रनको लक्ष्य वेष्ट इन्डिजले १८ दशमलव १ ओभरमा ४ विकेटको क्षतिमा भेट्टायो ।
वेष्ट इन्डिजका लागि क्रिस गेलले ४८ बलमा ११ छक्का र पाँच चौकाको मद्दतमा नट आउट शतकीय पारी खेले । यस्तै मार्लोन सामुएल्सले २७ बलमा ३७ रन बनाए । उनले ८ चौक प्रहार गरे ।
इंग्ल्याण्डका डेविड विल्ली, रिस टोप्लेय, अदिल राशिद र माइन अलीले एक एक विकेट लिए । यसअघि पहिले ब्याटिङ गरेको इंग्ल्याण्डले पूरै २० ओभर खेल्दै ६ विकेटको क्षतिमा एक सय ८२ रन बनाएको थियो ।
