भक्तपुर, २१ फागुन ।
यस वर्षको प्रवेशिका अर्थात् एसएलसी परीक्षाका लागी प्रश्नपत्र छपाईको काम सकिएको परीक्षा नियन्त्रण कार्यालय सानोठिमीले जनाएको छ ।
परीक्षा नियन्त्रक कृष्णप्रसाद काप्रीले गोप्यरुपमा एसएलसीको प्रश्नपत्र छपाइसमेत सकिएको र बिभिन्न जिल्लामा पठाउन पनि सुरु गरिएको बताउनु भयो ।
उहाँले बिहिवारदेखि नै परीक्षाका लागि आवश्यक पर्ने प्रश्नपत्र उत्तरपुस्तिका लगायतकासबै सामग्री सबै जिल्लामा पठाई सकिएको भन्दै बाँकी रहेका बागमतीका, दोलखा, सिन्धुपाल्चोकलगायत १० जिल्लामा पनि पठाउने तयारी रहेको बताउनु भयो ।
परीक्षामा यस वर्ष छ लाख १५ हजार विद्यार्थी सहभागी हुनेछन् । परीक्षा नियन्त्रण कार्यालयका उपनियन्त्रक अनुपमचन्द्र श्रेष्ठले नियमित र एक्जाम्टेड गरी छ लाख १२ हजार तथा प्राविधिकतर्फका तीन हजार विद्यार्थीले परीक्षामा सहभागी हुने जानकारी दिनुभयो । जसमा नियमिततर्फ चार लाख ५२ हजार ८८१ र एक्जाम्टेडतर्फ एक लाख ५९ हजार ४१७ विद्यार्थी सहभागी हुनेछन् ।
नियमिततर्फ प्राविधिकतर्फका ९९ विद्यालयका तीन हजार २५५ विद्यार्थी सहभागी हुँदैछन् । जसमा नियमिततर्फ दुई लाख २५ हजार ३४६ छात्र र दुई लाख २७ हजार ५३५ छात्रा सहभागी हुनेछन् । श्रेष्ठले सबैभन्दा बढी काठमाडौँमा ३५ हजार र सबैभन्दा कम मनाङमा ६९ जनाले परीक्षा दिने जानकारी दिनुभयो ।
यस वर्ष एसएलसी परीक्षाका लागि देशभर एक हजार ४४३ परीक्षा केन्द्र निर्धारण गरिएको छ ।
