माघ २९ धरान / सरस्वति बाल आश्रममा आश्रित बालबालिकाहरुको लागि ३६५ दिनै पोषणयुक्त खानाको कार्यक्रमले एकवर्ष पूरा गरेको अवसरमा वर्षगाँठ मनाउने तयारी गरेको छ ।
फागुन १ गते सरस्वति पूजाको अवसर पारेर वर्षगाँठ मनाउन लागेको हो ।
गत माघ ११ गते सरस्वति पूजाबाट कार्यक्रम सुरु भएको थियो । आश्रममा २० जना बालबालिकाहरु आश्रित छन् । जस्मा २८० जना दाताहरुको सहयोगबाट पोषणयुक्त खाना खुवाइएको आश्रमका सचिव मनिष खड्गीले आज पत्रकार सम्मेलनमा जानकारी दिनुभयो ।
२०४८ सालदेखि सुरु भएको यो आश्रममा यो कार्यक्रम लागू गरिएको हो ।
यो कार्यक्रमलाई थप पूरा गर्नको लागि पनि दाताहरुको खोजीमा आश्रम लागेको छ । २८० दाताहरुबाट ६ लाख ३५ हजार ५ सय २२ रुपैया संकलन भएको थियो ।
त्यसमध्ये ६९ हजार ९ सय ७० रुपैया बचत भएको पोषण युक्त कार्यक्रमका संयोजक बिकास बनेपालीले बताए ।
त्यस्तै ७६ जना दाताहरुले दिएको १ लाख ३० हजार ३ सय रुपैया रकम बचत रहेको छ । यो वर्ष पनि त्यो कार्यक्रमलाई निरन्तरता दिने उद्देश्य संस्थाले राखेको छ ।
संस्थाले हरेकवर्ष झै यो वर्ष पनि निःशुल्क आँखा शिविर राख्ने तयारी गरेको छ । फागुन ३ गते शिविर हुने आश्रमकी अध्यक्ष अम्बिका राईले बताइन् ।
