काठमाडौं, २९ माघ ।
राजस्व अनुसन्धान विभागले काठमाडौंको एसओएससहित राजधानीका ५ वटा म्यानपावर कम्पनीमा छापा मारी कागतपत्र नियन्त्रणमा लिएको छ ।
लाखौं रुपैयाँ कर छली गरेको आशंकामा काठमाडौंको धापासीमा रहेको एसओएस म्यानपावर सर्भिस,इन्टरनेसनल मेनपावर रिक्रुटमेन्ट प्रालि, क्याराभान इम्प्ल्वाइमेन्ट प्रालि, आर्कषक इन्टरनेशल प्रालि र द रिभर ओभरसिजमा छापा मारेको हो ।
सरकारलाई तिर्नुपर्ने कर नतिरि गैर कानुनी रुपमा कार्य गरिरहेको भन्दै ती म्यानपावरमा छापा मारि सम्पूर्ण कागजात र कम्प्युटरसमेत नियन्त्रणमा लिएर अनुसन्धान गरिरहेकोे विभागले जनाएको छ ।
अख्तियार दुरुपयोग अनुसन्धान आयोगले पनि वैदेशिक रोजगारीका नाममा मानव बेचबिखन भएको भन्दै चासो व्यक्त गरेको छ ।
यता ठगीको उजुरीको चाङ परेपछि महानगरीय अपराध महाशाखाले पनि म्यानपावर कम्पनी र उनीहरुका एजेन्टमाथि निगरानी गरि भित्र भित्रै अनुुसन्धान गरिरहेको बताएको छ ।
त्यस्तै कर छलीकै आशंकामा विभागले काठमाडौंको कंगारु एजुकेशन फाउण्डेशन, दीक्षा इन्टरनेशनल, अरबिट इन्टरनेशनल एजुकेशन नेपाल, इन्टरनेसनन एजुकेशन कन्सल्ट्यान्सी र भायोनेट कम्युनिकेशन एवं इन्फोकम कम्पनीमा पनि छापा मारेको छ । विभागले उनीहरुको पनि सम्पूर्ण कागजात नियन्त्रणमा लिएको छ ।
