काठमाडौं, १८ माघ ।
आईसिसि अण्डर १९ विश्वकप क्रिकेटमा नेपालले आज बलियो प्रतिद्धन्दि भारतसँग प्रतिस्पर्धा गर्ने छ ।
समुह डि अन्तरगतको लिग चरणको आफ्नो अन्तिम खेलमा नेपाल र भारत भिड्न लागेका हुन् । यो खेलको नतिजाले समूहको विजेता र उपविजेताको टुंगो लाग्नेछ ।
नेपाल र भारत यसअघि नै लगातार दुई खेलमा जित हात पार्दै प्रतियोगिताको क्वाटरफाईनलमा पुगिसकेका छन् ।
नेपालले आफ्नो पहिलो खेलमा न्युजल्याण्डलाई ३२ रनले पराजित गर्नुका साथै दोस्रोमा आयरल्याण्डमाथि ८ विकेटको जित हासिल गरेको थियो ।
यस्तै भारतले पनि आयरल्याण्डलाई ७९ रन तथा न्युजल्याण्डलाई १ सय २० रनले पराजित गरेको थियो ।
बङ्गलादेशको फाल्तुल्हास्थित खान साहेब उस्मान अली रङ्गशालामा नेपाली युवा टोलीले आज दबाबरहित खेल खेल्ने प्रशिक्षक जगत टमाटाले बताएका छन् ।
विश्व कपमा सन् २००० मा पहिलो पटक सहभागिता जनाएको नेपालले त्यति बेला क्वाटर फाइनलको यात्रा तय गरेको थियो ।
