काठमाडौं,१६ माघ ।
बंगलादेशमा जारी आइसीसी अन्डर १९ विश्वकप क्रिकेटमा आयरल्याण्डले नेपाल सामु एक सय ३२ रनको चुनौती पेश गरेको छ ।
बंगलादेशको फल्तुल्लाह स्थित खान साहेब ओसमान अलि रंगशालामा टस जितेर पहिले ब्याटिङ गरेको आयरल्याण्डले निर्धारित ५० ओभरमा ९ विकेट गुमाएर एक सय ३१ रन बनायो ।
उसका लागि ह्यारी टेक्टोरले ३०, ज्याक टेक्टोरले २७, लोर्केन टाकरले १५ तथा एडम डेनिसनले १४ रन बनाए । आयरल्याण्डको इनिङ्स् धराप पार्ने क्रममा नेपालका सन्दिप लामिछाने एक्लैले पाँच विकेट लिए ।
लामिछानेले लगातार तीन विकेट लिएर ह्याट्रिक पूरा गरे । उनले ३२ औं ओभरको चौंथो, पाँचौं र छैटौं बलमा लगातार विकेट लिएर ह्याट्रिक गरेका हुन् । यस्तै दिपेन्द्र सिंह ऐरीले दुई तथा सुनिल धमला र सुशिल कँडेलले एक एक विकेट लिए ।
एक सय ३२ रनको लक्ष्य पछ्याउदै नेपालले केहिबेरपछि जवाफी ब्याटिङ सुरु गर्नेछ । यसअघि मलेसियामा गत अक्टोबरमा भएको आइसिसी अण्डर १९ विश्वकप छनौट प्रतियोगिताको राउन्ड रोबिन र फाइनल खेलमा नेपालले आयरल्यान्डलाई पराजित गरेको थियो ।
आजको खेल जिते नेपाल दोस्रो चरणमा प्रवेश गर्ने छ । समूह डी मा रहेको नेपाल २ अंकसहित अंक तालिकामा दोस्रो स्थानमा छ भने समान अंक जोडेको भारत पहिलो स्थानमा छ ।
प्रतियोगितामा चार समूहमा रहेका टोली १६ टोली मध्ये प्रत्येक समूहको शीर्ष दुईमा रहने टोली अघिल्लो चरण प्रवेश गर्ने छन् ।
