काठमाडौ, १६ माघ ।
पोखरामा जारी आहा रारा गोल्डकपको उपाधिका लागि आज विभागीय टोली त्रिभुवन आर्मी क्लब र मनाङ मर्स्याङदी क्लबबीच प्रतिस्पर्धा हुदैछ ।
खेल दिउँसो एकबजेपछि पोखरा रंगशालामा हुनेछ । मनाङ क्वाटरफाइनलमा इण्डियन आर्मी गोर्खा ब्रिगेड र सेमिफाइनलमा झापा ११ लाई हराउदै आर्मीसँगको उपाधि भेट पक्का गरेको हो ।
यता आर्मी पहिलो खेलमा जावलाखेल , क्वाटरफाइनलमा थ्रिस्टार र सेमिफाईनलमा आयोजक सहारा क्लबलाई फाइनल प्रवेश गरेको हो ।
आहा रारा गोल्डकपमा यसअघि ८ पटक फाइनल पुगेको मनाङले दुई पटक मात्रै उपाधि जितेको छ । तेस्रो र दशौ संस्करणको उपाधि उचालेको मनाङ अघिल्लो बर्ष १३ औं संस्करणको उपविजेता टिम हो ।
मनाङले सुरुवाती क्याराभान गोल्डकप सहित दोस्रो, पाँचौ, नवौ र १२ औं संस्करणको उपविजेतामा चित्त बुझाएको थियो ।
विभागीय टिम आर्मी अहिलेसम्म दुई पटक फाइनल पुगेको छ र दुवै पटक उपविजेतामै सीमित रहेको छ । आहा ! रारा गोल्डकपमा आर्मी सातौ र आठौ संस्करणको उपविजेता टिम हो ।
