काठमाण्डौ, २९ पुस । बंगलादेशमा जारी बंगबन्धु गोल्डकप फुटवलमा नेपालले श्रीलंका बिरुद्ध १–० को जीत निकाल्दै साफमा भएको पराजयको बदला समेत लिएको छ । भारतमा भएको साफमा नेपाल श्रीलकासग १–० ले पराजीत भएको थियो । यद्यपि यस प्रतियोगीतामा नेपालको २३ वर्ष मुनिको राष्ट्रिय टिमले सहभागीता जनाएको छ । ढाकाको बंगबन्धु रंगशालामा जारी खेलको दोस्रो मिनेटमा नै बिमल घर्ती मगरले गोल गर्दै नेपाललाई जीतको दिशामा अघि बढाएका थिए ।
डिफेन्डर रबिन श्रेष्ठको पासमा बिमलले गोल गरेका थिए । त्यस पछि अन्जन विष्ट, हेमन गुरुङ, नवयुग श्रेष्ठ र बिक्रम लामाले पाएका अवसरहरु खेर फाल्दा नेपाल थप गोल गर्नबाट चुक्यो । निकै आक्रामक खेल खेलेको नेपालको डिफेन्स लाईन केही फितलो बनेको थियो । पहिलो खेलमा मलेसियाको फेल्डासंग गोलरहित बराबरी खेलेको नेपाल सेमिफाईनल पुग्ने संभावना बलियो बनेको छ । नेपालको ४ अंक भएको छ । नेपालले समुह चरणको अन्तिम खेलमा शुक्रबार आयोजक बंगलादेश विरुद्ध खेल्ने छ ।
नेपाल सम्मिलित समुह एमा श्रीलंकासंगै मलेसिया र बंगलादेश छन् । तालिकामा एक अंक जोड्दै नेपाल दोस्रो स्थानमा छ भने अंक विहिन श्रीलंका तालिकाको पुछारमा छ । शिर्ष स्थानको बंगलादेशको ३ अंक छ । पहिलो खेलमा श्रीलंका बंगलादेशसंग ४–२ गोल अन्तरले पराजित भएको थियो ।
