कालीकोट, १७ पुस ।
जिल्लामा पहिलोपटक खेलाडीहरुलाई सम्मानित भएका छन् ।
जिल्लामा खेल क्षेत्रमा राष्ट्रिय क्षेत्रमा उल्लेखनीय योगदान पु¥याएबापत दुईजना सम्मानित भएका छन् । स्युना गाविसका खेमबहादुर शाही र बदालकोट गाविसका रामबहादुर शाहीलाई सम्मान गरिएको हो ।
खेमबहादुर शाहीलाई स्युना गाविसले आठौँ गाउँ परिषद्बाट दोसल्ला ओढाइ सम्मान गरेको छ भने बदालकोट गाविसको कार्यालय पनि गाउँ परिषद्को उद्घाटन समारोहमा दोसल्ला ओढाइ सम्मान गरेको हो ।
खेमबहादुर शाहीले ज्याम्लिङ र सटपुट खेलमा राष्ट्रियस्तरमा अग्रस्थान कायम राखेको भन्दै गाविसले सम्मान गरेको हो भने रामबहादुर शाहीले भलिबल खेलमा राष्ट्रियस्तरमा सहभागी भएकाले गाविसको मात्र नभई जिल्लाको नाम राखेको भन्दै सम्मान गरेको हो ।
गाविसस्तरमा प्रत्येक वर्ष राम्रो काम गर्नेलाई सम्मान र नराम्रो काम गर्नेलाई बहिष्कार गर्ने वातावरण हुनुपर्ने स्थानीय सूर्यबहादुर शाहीले बताउनुभयो । उहाँले राम्रोलाई सधैँ सहयोग गरेर नयाँ उचाइमा लिनुपर्नेमा जोड दिनुभयो ।
कालीकोट जिल्लामा खेललगायतका क्षेत्रमा उल्लेखनीय योगदान गरेबापत सम्मान र पुरस्कृत गर्ने कामको थालनी गाविसस्तरबाट हुनुपर्नेमा सरोकारवालाले जोड दिएका छन् ।
