जुम्ला, १३ पुस ।
यही पुस १८ गते काठमाडौैँको गोकर्णमा सञ्चालन हुने म्याराथन दौड प्रतियोगितामा जुम्लाका छ जना मेडलिस्ट सहभागी हुने भएका छन् ।
द नर्थ फेस काठमाडौँ अल्ट्राद्वारा आयोजित म्याराथुनमा भाग लिने खेलाडीलाई कर्णाली स्पोर्टस् क्लबले आज बिहान बिदाई गरेको छ । म्याराथनमा पुरुषतर्फ ८० किमीमा राजन रोकाया, ५० किमीमा दीपेन्द्रबहादुर बम, २७ किमीमा गोविन्दप्रसाद अधिकारीले भाग लिएको क्लबका अध्यक्ष सरोज शाहीले जानकारी दिनुभयो ।
त्यसैगरी, महिलातर्फ हङकङ दौड प्रतियोगितामा प्रथम स्थान हात पारेकी विष्णुमाया बुढा, क्षेत्रीय दौड प्रतियोगितमा द्वितीय भएकी सुनमाया बुढा र तृतीय भएकी पूर्णलक्ष्मी न्यौपानेले १२ किमीमा भाग लिने उहाँको भनाइ छ ।
उनीहरुलाई निःशुल्क काठमाडौँसम्म पु¥याउनका लागि बस व्यवसायीद्वय सूर्यप्रसाद डुम्रे र कमलप्रसाद डुम्रेले सहयोग गर्नुभएको छ । त्यस्तै खेलाडीको लागि जिविस, जिल्ला खेलकुद विकास समिति र निर्माण व्यवसायी सङ्घ जुम्लाले रु ४० हजार सहयोग गरेका छन् । रासस
