काठमाडौं, पुस ३ ।
एएफसी यु–१४ महिला च्याम्पियनसिप फुटबलको फाइनल खेल आगामी आइतबार राजधानीमा हुदै छ । बैशाख १२ गतेको विनाशकारी भूकम्पका कारण स्थगित भएको खेल आइतबार हुने अखिल नेपाल फुटबल संघ एन्फाले जनाएको छ ।
आज पत्रकार सम्मेलन गरी एन्फाले फाइनल खेल आयोजनाको सम्पूर्ण तयारी पूरा भएको जनाएको छ । गत वैशाख १२ गते काठमाडौंको दशरथ रंगशालामा हुनुपर्ने नेपाल र बंगलादेशबीचको फाइनल खेल सोहि दिन गएको भूकम्पका कारण स्थगित भएको थियो ।
गत वैशाख ७ गतेदेखि १२ गतेसम्म काठमाडौंमा आयोजना भएको १४ वर्षमुनिको एएफसी च्याम्पियनसिप महिला फुटबलमा नेपाल र बंगलादेशसहित भारत, इरान, श्रीलंका, भुटान र माल्दिभ्सले प्रतिस्पर्धा गरेका थिए ।
नेपालले सेमिफाइनमा भारतलाई १–० ले हराउँदै फाइनलमा स्थान सुरक्षित गरेको थियो भने बंगलादेशले इरानलाई २–० ले निराश पार्दै नेपालसँगको उपाधि भिडन्त पक्का गरेको थियो ।
लगनखेलस्थित नेपाल आर्मीको शारीरिक तालिम केन्द्रको फुटबल मैदानमा फाइनल खेल हुने जनायएको छ । फाइनल खेल्न बंगलादेशको टोली नेपाल आइसकेको छ ।
