पर्बत ,११ कात्तिक ।
पर्वतको सल्यानस्थीत एउटै वडाका किसानहरुले व्यवसायिक तरकारी खेती गरेर वर्षेनी करोडौँ रुपैयाँ गाउँमा भित्र्याउने गरेका छन् । करिव एक हजार रोपनीमा फैलिएको जमिनमा यहाँका तीन सय बढी परिवारले तरकारी खेतीबाट मात्रै वार्षिक रु पाँच करोड आम्दानी गर्न सफल भएका हुन् ।
बीस वर्ष अघिदेखि धौलागिरिमै पहिलो पटक व्यवसायिकरुपमा बेमौषमी तरकारी खेती सुरु गरेका यहाँका किसानले उत्पादन गरेको तरकारीले बाग्लुङ, म्याग्दी र पर्वतको माग धानेको छ । तराई बन्द र भारतीय नाकाबन्दीको असरले मुलुकका विभिन्न जिल्लामा तरकारीको मुल्य आकासिएका बेला यहाँको उत्पादनले यी तीनै जिल्लामा तरकारीको मुल्य बढ्नुको सट्टा घटेको छ ।
तराइ बन्द र नाकाबन्दीका कारण गोलभेँडा, घिरौँलालगायतका तरकारीको मुल्य सस्तिएपछि यहाँका अधिकाँश किसान बिऊ उत्पादनमा लागेका छन् । गाउँका अधिकाँश किसान अहिले धान, गहुँ, मकैलगायतका खाद्यान्न बाली छोडेर तरकारी खेतीमा लागेका छन् ।
खाद्यबालीको तुलनामा तरकारीबाट दसौंँ गुणा बढी आम्दानी हुने भएपछि वडाभरी रहेका करिव तीन सय परिवार सबै तरकारीमा लागेका हुन् । वरिष्ठ कृषि विकास अधिकृत बासुदेब रेग्मीका अनुसार कार्यालयले पछिल्लो समय किसानहरुका लागि प्राविधिक तथा आर्थिक सहयोग गर्दै आइरहेको छ । युवा किसानलाई लक्षित गरी कार्यालयले गतवर्षदेखि कृषि बिमा र यूवा स्वरोजगार कार्यक्रममार्फत सहयोग गर्दै आइरहेको छ ।
