काठमाडौ ३० भदौ ।
आज हरितालीका तिज । नेपाली हिन्दु नारीहरुले देवाधिदेव महादेवको पूजा अर्चना र व्रत बसि हर्षोल्लासका साथ मनाएका छन् ।
खास गरी पशुपति सहित देशै भरका मन्दिरहरुमा महिलाहरुको ठूलो घुईचो देखियो । उनीहरुले रातो सारी लगाएर घरैमा बसेर पनि छम छम नाचेका छन् ।
हिमालयकी छोरी पार्वतीले महादेव पति पाउनका लागि कठोर ब्रत गरी आफ्नो कामना पूरा गरेको धार्मिक कथनअनुसार यो पर्व मनाइँदै आएको मानिन्छ ।
आज महिलाहरू सबेरै स्नान गरी शुद्ध वस्त्र पहिरेर शिव मन्दिरहरुमा गई शिव–पार्वतीको पूर्जाअर्चना गर्ने चलन छ । तीज अवधिभर महिलाहरू सौभाग्यको प्रतिक रातो पहिरनमा सजिन्छन् ।
यस पर्वमा पानीसमेत नखाई विवाहित महिलाहरु शिवको पूजा आराधना गर्दै आफ्ना पतिको दिर्घायुको कामना गरी ब्रत बस्दछन् भने अविवाहित महिलाहरु सुयोग्य तथा आदर्श पति प्राप्त गर्ने कामनाका साथ ब्रत बस्ने गर्दछन ।
यस दिन जलसमेत नखाई ब्रत बस्नुपर्ने हुनाले अघिल्लो दिन बेलुकी नै विभिन्न परिकार तथा मिष्ठान्न तयार गरी दर खाने प्रचलन छ ।
यसैबीच आज राजधानीको पशुपतिनाथ मन्दिर सहित मुलुकभरका शिवालयहरुमा दर्शनार्थीहरुको बिहानैबाट घुइचो लागेको थियो ।
व्रतालु महिलाका लागि व्यवस्थित ढङ्गले दर्शन गराउन पशुपतिनाथ मन्दिरमा तीनतिरबाट लाइनको व्यवस्था गरिएको थियो ।
यसै गरी ललितपुरको कुम्भेश्वरमा पनि तीजका अवसरमा महिलाहरुले पूजा गरी मनाएका छन् । कुम्भेस्वरमा महिलाहरुको ठूलो घुईचो लागेको थियो ।
उता उदयपुरमा महिला दिदीवहिनीहरुले नाँचगान र पूजाआरधनाका साथ हरितालिका तीज पर्व भब्यताका साथ मनाएका छन् ।
जिल्लाको विभिन्न ठाउँबाट जम्मा भएका महिलाहरुले गाईघाटको लोकतान्त्रिक चौकमा तीज कार्यक्रमको आयोजना गरी नाँचगानका साथ मनाएका थिए । रातो सारी चोला, हरियो पोते र चुरामा सजिएका महिलाहरुले तीज सम्बन्धी गितहरु गाउँदै नाँचेका थिए ।
सदरमुकाम गाईघाट र आसपासमा रहेका शिव मन्दिरहरुमा पूजा आराधाना गरी जम्मा भएका महिलाहरुले गीतकै माध्यमबाट शुभकामना आदानप्रदान गरेका थिए ।
उनीहरुले गीतकै माध्यमबाट महिलामैत्री संविधानको माग समेत गरेका छन् ।
महिला हिंसाको अन्त्य गरी समृद्ध समाज निर्माणका लागि तीजको सन्देश महत्वपूर्ण हुने भन्दै उनीहरुले आप्mनो दुःख पिडाको भाव पनि ब्यक्त गरेका थिए ।
