काठमाडौं, ३२ साउन ।
दुई पटक सर्किट ब्रेक लागेको नेप्से सोमबार निकै सकारात्मक देखिएको छ ।
व्यापार समूहबाहेक सबै समूहका शेयर उकालो लागेका छन् । बाणिज्य बैंक सहित केही सूचिकृत कम्पनीको सेयर डिम्याट मात्रै कारोबार भएपछि सेयर बजारमा सकारात्मक प्रभाव देखिएको हो ।
बजारमा आपूर्ति कम भएकाले शेयर बजार माथि चढेको ब्रोकरहरु बताउँछन् । सोमबार ८२ करोड ५५ लाख ६९ हजार ४ सय ८० रुपैँया बराबरको नेप्से कारोबार भएको छ ।
कुल १ सय २७ वटा कम्पनिको १३ लाख ५३ हजार ६ सय ४९ कित्ता शेयर ३ हजार ६ सय ६७ पटक कारोबार भयो । समग्रमा शेयर बजार ४५.५५ अंकले बढेर १ हजार १ सय ५७ दशमलव ६ अंकमा कायम भएर बन्द भयो ।
दुई पटक सर्किट ब्रेक लागेपछि दिउसो एक बजे बजार ११४२ अंकमा पुगेर बजार ओरालो लाग्न थालेको थियो । सोमबार बैँकिङ समूहको शेयर ६४.६७ अंकले बढेको छ भने होटल समूहको शेयर २९.६७ अंकले बढेको छ ।
त्यस्तै, विकास बैँक ९.४८, उत्पादनमूलक ६७.४६, फाइनान्स १.९६, विमा २८.०९, जलविद्युत २५.४५ र अन्य समूहको शेयर २९.३७ अंकले उकालो लागेका छन् । व्यापार समूहको शेयर भने ६.४१ अंकले घटेको नेप्सेले जनाएको छ ।
त्यस्तै, सोमबार सबैभन्दा बढी रकमको कारोबार गर्ने कम्पनि ग्लोबल आइएमई बैँक रह्यो । बैँकले ६ करोड ९४ लाख ४० हजार ६ सय ८५ रुपैँया बराबरको कारोबार गरेको बताइएको छ ।
त्यस्तै, सिटिजन्स बैँक र इन्भेष्टमेन्ट बैँकको प्रोमोटर शेयरको ५ करोडमाथिको कारोबार भएको छ भने नेपाल बंगलादेश बैँक र एभरेष्ट बैँकको ४ करोडमाथिको शेयर कारोबार भएको छ ।
एनआईसी एसिया, नविल बैँक, नविल बैँकको प्रोमोटर शेयर र प्रभु बैँकको ३ करोड रुपैँयाभन्दा बढीको शेयर कारोबार भएको छ भने चिलिमेको २ करोडमाथिको शेयर कारोबार भएको छ ।
