काठमाडौ १८ साउन । उच्च माध्यमिक शिक्षा परिषद्ले मुलुकभरका ३९ वटा उच्च माविको अनुमतिपत्र खारेज गरेको छ ।
परिषदले आज सार्वजनिक सूचना जारी गर्दै दुई वर्षभन्दा बढी समयदेखि कक्षा सञ्चालन नगरेका उच्च माविहरुको सम्बन्धन खारेज गरिएकोे जनाएको छ ।
खारेजी प्रक्रियामा रहेको भन्दै ७१ वटा उच्च माविलाई परिषद्ले गत असार ७ गते १५ दिनभित्र स्पष्टीकरण दिन भनिएकोमा स्पष्टीकरण दिन नसकेका उच्च माविहरु खारेजीमा परेका हुन् ।
सम्बन्धन खारेज हुनेमध्ये सामुदायिक विद्यालयको उच्च मावि दुई वटा, क्याम्पस १३ वटा, निजी २० वटा, संस्थागत दुई, प्लस टु मात्रै सञ्चालन गर्ने भनेर अनुमति लिएका दुई वटा रहेका छन् ।
परिषद्ले कक्षा ११ र १२ को अध्ययन अध्यापनका लागि यसअघि अनुमति लिएका उक्त उच्च माविहरुलाई कुनै पनि शैक्षिक कार्यक्रममा विद्यार्थी भर्ना नगर्न नगराउन समेत निर्देशन दिएको छ ।
