एजेन्सी २ साउन ।
भ्रष्टाचारको आरोपमा बोलिभिया फुटबल संघका अध्यक्ष कार्लोस चाभेजलाई गिरफ्तार गरिएको छ ।
दक्षिण अमेरिकी फुटबल संघका कोषाध्यक्ष समेत रहेका चाभेजमाथि सरकारी वकिलले संसाधन प्रवन्धनमा भ्रष्टाचारको आरोप लगाएका छन् ।
बोलिभिया फुटबलसँग आवद्ध करिब २० अधिकारीले उनीविरुद्ध अदालतमा प्रमाण पेश गरेका थिए । संघका महासचिव एल्बर्टो लोजादालाई पनि म्याच फिक्सिङको आरोपमा गिरफ्तार गरिएको छ । फिफामा भ्रष्टाचारको आरोपपछि बोलिभियाले आफ्नो फुटबल संघमा अनुसन्धान थालेको हो ।
स्वीटरजरल्याण्ड प्रहरीले गत महिला ज्यूरिखको एक होटलबाट फिफाका सात वरिष्ठ अधिकारीलाई भ्रष्टाचारको आरोपमा गिरफ्तार गरेको थियो । अमेरिकी न्याय विभागले फिफाका १४ वर्तमान र पूर्व अधिकारीमाथि ‘ठूलो परिमाणमा प्रणालीगत’ तरिकाबाट भ्रष्टाचार फैलाउन दोषी रहेको ठहर गरेको थियो ।
सोही आधारमा उसले स्वीस प्रहरीसँग ती सात अधिकारीलाई गिरफ्तार गर्न मद्दत मागेको थियो । गिरफ्तार गरिएका अधिकारीहरुमा दक्षिण अमेरिकी फुटबल संघका दुई पूर्व अध्यक्ष पनि छन् ।
