काठमाडौ १ साउन । ट्वान्टी २० विश्वकप छनोट खेलमा आज नेपालले पपुवा न्युगिनीसँग खेल्दैछ ।
खेल नेपाली समय अनुसार आज दिउँसो पौने तीन बजे आयरल्याण्डको डब्लिनमा सुरु हुनेछ ।
समुह ए मा रहेको नेपालले ४ खेलबाट ३ अंक जोडेको छ भने तीन खेल खेलेको पपुवा न्युगिनीको ५ अंक रहेको छ ।
समुहमै रहेको हङकङ र नामीबियाको पनि समान तीन अंक रहेपनि नेपाल नेट रनरेटका आधारमा पछि परेको छ ।
हङकङसँगको हारपछि शीर्ष दुई स्थानमा पुग्ने सम्भावना लगभग समाप्त भइसकेको नेपालका लागि प्लेअफ स्थानमा पुग्न आजको खेल जित्नैपर्ने दवाव छ । प्रतियोगितामा निकै फर्ममा देखिएको पपुवा न्युगिनी नेपालका लागि कडा प्रतिद्धन्द्धी मानिन्छ ।
छनोट प्रतियोगितामा लगातार दुई पटक विजेता आयरल्याण्ड माथि सनसनीपूर्ण जीत निकालेको पपुवा न्युगिनी प्रतियोगिताकै एक्लो अपराजित टोली हो । सात टीम सहभागी रहेको समुह ए मा नेपाल पाँचौ स्थानमा छ ।
