काठमाडौं, ३० असार । विश्वकप ट्वेन्टी–२० छनोट क्रिकेट प्रतियोगिताको चौथो खेलमा नेपालले आज हङकङको सामना गर्दैछ ।
खेल नेपाली समय अनुसार साँझ सात बजेपछि आयरल्याण्डको बेलफास्टमा सुरु हुनेछ ।
नेपाल तीन अंक सहित समुहको चौथो स्थानमा छ । तीन खेल खेलेको नेपाल आज हङकङलाई पराजित गर्दै अंक तालिकामा आफ्नो स्तर सुधार गर्ने लक्ष्य सहित मैदान उत्रदैछ ।
यसअघि आफ्नो पहिलो खेलमा नेपालले अमेरिकालाई ६ विकेटले पराजित गरेको थियो भने दोस्रो खेल वर्षाका कारण प्रभावित भएपछि नामिबियासँग अंक बाँडिएको थियो ।
यस्तै तेस्रो खेलमा नेपाल अयोजक आयरल्याण्डसँग ८ विकेटले पराजित भएका थिए । आजको खेलमा जित हात पार्न सके नेपालको विश्वकप छनौटका लागि सहज बाटो जिवितै रहने छ ।
चिरपरिचित प्रतिद्धन्द्धी हङकङमाथि नेपालको विगत केही राम्रो रहेपनि आजको खेलमा जित निकाल्न संघर्ष गर्नु पर्ने देखिन्छ । ट्वेन्टी–ट्वेन्टी छनौट प्रतियोगितामा अहिलेसम्म दुई खेल खेलको हङकङ एक अंक सहित तालिकाको छैटौं स्थानमा छ ।
