काठमाडौं, २९ असार ।
सरकारले आगामी आर्थिक बर्ष ७२÷७३ को बजेट आज सार्वजनिक गर्दै छ ।
पहिलो संविधानसभाको निर्वाचनपछि राजनीतिक अवरोध विना समयमै आउन लागेको बजेटको आकार ८ खर्ब २५ अर्बसम्मको हुनेछ । बजेटमा भूकम्पपछिको पुनर्निर्माण र सामाजिक सुरक्षाका कार्यक्रमलाई विशेष प्राथमिकता दिइएको छ ।
अर्थ मन्त्रालय स्रोतका अनुसार पुनर्निर्माणमा यो वर्ष ९० अर्ब रुपैयाँ विनियोजन गरिएको छ । राष्ट्रिय योजना आयोगले भूकम्पपछिको पुनर्निर्माणमा करिब ७ खर्ब रुपैयाँ लाग्ने अनुमान गरेको थियो।
कर्मचारीको तलब वृद्धि नहुने र निर्वाचन क्षेत्र विकास कार्यक्रमको रकम बढाएर अधिकतम डेढ करोडसम्म पुग्ने स्रोतले उल्लेख गरेको छ । अर्थमन्त्री डा. रामशरण महतले बजेटमा ६ प्रतिशतको आर्थिक वृद्धिदर हासिल गर्ने लक्ष्य राखिएको बताउनुभयो ।
आगामी बजेटमा वृद्धभत्ता दोब्बर बढाएर हजार रुपैयाँ पुग्ने भएको छ भने दलित तथा पिछडिएका वर्गका बालबालिकालाई छात्रवृत्तिको कार्यक्रम ल्याइएको छ ।
त्यस्तै स्थानीय निकाय निर्वाचनका लागि पनि बजेट विनियोजन गरिने भएको छ । पुर्ननिर्माणमा खर्च बढ्ने तर राजस्व कम उठ्ने भएपछि दातृ निकाय र आन्तरिक ऋणबाट श्रोत परिचालन गरिएको छ । करका दरमा खासै परिवर्तन नगरिए पनि दायरा बढाउने कार्यक्रम बजेटमा आउने अर्थमन्त्रालयले बताएको छ । आय करको सीमामा भने वृद्धि हुने भएकोछ ।
