जनकपुर, २५ असार ।
जनकपुर नगरक्षेत्रमा मासु व्यावसायीहरुले खसीको भन्दै बाख्राको मासु बेच्ने गरेको खुलेको छ ।
जिल्ला पशुसेवा कार्यालयले गरेको अनुगमनका क्रममा ५० प्रतिशत बाख्राको मासु बिक्री हुने गरेको भेटिएको हो । जिल्ला पशु सेवा कार्यालय धनुषाका अनुसार त्यहाँका मासु बिक्रेताले खसी भन्दै ५० प्रतिशत बाख्राको मासु बिक्री गर्ने गरेको पाइएको छ ।
आज बिहान जिल्ला पशु सेवा कार्यालयका वरिष्ठ पशु चिकित्सक डा शम्भू साहको नेतृत्वको टोलीले नगरक्षेत्रका मासु पसलमा अनुगमन गर्दा दुईवटा पसलमा बाख्राको मासु बिक्री गरेको फेला पारेको छ ।
जनकपुर उपमहानगरपालिका–१ मा रहेका १५ ओटा पसलहरुमा अनुगमन गर्दा सुलेमान धोवी र सद्दाम दर्जीको मासु पसलमा खसीको मासु भन्दै बाख्राको मासु बिक्री गरेको फेला पारेको थियो ।
अनुगमन टोलीले दुवै पसलबाट करिब २० हजार मूल्य बराबरको बाख्राको मासु नियन्त्रणमा लिई नष्ट गरेको छ ।
