काठमाडौँ, २५ असार ।
भारतमा सन् २०१६ मा हुने विश्वकप टि – ट्वान्टी प्रतियोगिताका लागि भैरहेको छनौट खेलमा आज नेपालले अमेरिकाको सामना गर्दै छ । खेल नेपाली समय अनुसार साँझ ७ बजे सुरु हुनेछ ।
आयरल्याण्ड र स्कटल्याण्डमा हिजो सुरु भएको खेलमा १४ देशको सहभागीता रहेको छ । समूह ए मा नेपालले अमेरिकासंग भिड्दै आफ्नो यात्रा प्रारम्भ गर्दैछ ।
प्रतियोगितामा सहभागी टिमलाई २ समूहमा बाडिएको छ । नेपाल समूह ए मा रहेको छ, जसमा अमेरिका, आयरल्याण्ड, पपुवा न्युगिनी, हङकङ, नामिबिया र जर्सी छन् ।
यसपटक अमेरिका कमजोर रहेकोले पनि नेपाल आफ्नो पहिलो खेलबाटै विजयी सुरुवात गर्ने दाउमा छ । सबैखाले क्रिकेटमा नेपाल र अमेरिकाले यसअघि १९ खेल खेलेका छन् । जसमा ११ खेलमा नेपाल विजयी भएको छ ।
तर, टी–२० क्रिकेटमा भने नेपाल र अमेरिकाबीच भएको एक मात्र खेलमा अमेरिकाले बाजी मारेको थियो । सन् २०१३ मा भएकोे अभ्यास खेलमा ५ विकेटले हारेको नेपाल आज सोही प्रतिद्धन्द्धीलाई हराउँदै जारी प्रतियोगितामा विजयी सुरुआत गर्न चाहन्छ ।
तथापि एक दिवसीयतर्फ भने अमेरिका र नेपाल १० पटक भिडिसकेका छन् । जसमध्ये ५ खेल नेपाले जितेको थियो भने ३ खेलमा नेपालले हार बेहोरेको छ र २ खेल रद्द भएका थिए ।
त्येसैले यो खेलमा पनि नेपालले अमेरिकालाई पाखा लागाउन सक्छ भन्ने धेरैको अनुमान छ । आज नेपाल विजयी लक्ष्यका साथ मैदान उत्रिदै छ ।
यस्तै आइसीसी विश्व क्रिकेट छनौट प्रतियोगिताको हिजो भएको उद्घाटन खेलमा स्कटल्याण्डले विजयी सुरुवात गरेको छ । सहआयोजक स्कटल्याण्डले युएईलाई ९ विकेटले हराउदै विजयी सुरुवात गरेको छ ।
प्रतियोगिताबाट ६ टोली आउँदो वर्ष भारतमा हुने विश्वकप टी–२० का लागि छानिने छन् । दुबै समूहका विजेता सोझै विश्वकपमा छानिने छन् भने दोस्रो, तेस्रो र चौथो हुने टोलीले ‘प्ले अफ’ खेल्ने अवसर पाउनेछन् । नेपाल र अमेरीकाबीचको खेलको लाईभ अपडेट www.mirmireonline.com मा हुने छ ।
नेपालले गत वर्ष बंगलादेशमा भएको टि ट्वेन्टी विश्वकपमा राम्रो प्रदर्शन गर्दै हङकङ र अफ्गानिस्तान विरुद्ध जीत हात पारेको थियो । आगामी वर्ष पनि नेपाल विश्वकप खेल्न सफल रहने अपेक्षा सहित मिर्मिरे परिवार नेपाली टिमलाई सफलताको शुभकामना व्यक्त गर्दछ ।
