काठमाडौ २० असार। कोपा अमेरिका फुटबल प्रतियोगिताको यसवर्षको उपाधि आयोजक चिलीले कब्जा गरेको छ ।
सान्टियागोको राष्ट्रिय स्टेडियममा आज बिहान भएको फाइनल खेलमा टाइब्रेकरमा अर्जेन्टिनालाई ४–१ ले पराजित गर्दै चिलीले पहिलो पटक उपाधि हात पारेको हो ।
खेलको निर्धारित ९० मिनेटमा दुवै टोलीले गोल गर्न नसकेपछि थपिएको अतिरिक्त ३० मिनेटको समयमा पनि गोल हुन सकेन । त्यसपछि खेलको निर्णय टाइब्रेकरबाट लिइएको थियो । टाइब्रेकरमा फर्नान्डेजले पहिलो गोल गर्दै चिलीलाई १–० को अग्रता दिलाए ।
त्यसपछि अर्जेन्टिनाका कप्तान लियोनल मेसीले गोल गर्दै १–१ को खेल बराबरीमा पुरयाए । चिलीका आर्टुरो भिडाल र चाल्र्स अरान्गेजले गोल गर्दा अर्जेन्टिनाका गोन्जालो हेगुइन र एभर बेनेगाले पेनल्टीमा गोल गर्न नसकेपछि चिलीले ३–१ को अग्रता लियो ।
त्यसपछि एलेक्स सान्चेजले गोल गर्दै चिलीलाई कोपा अमेरिकाको उपाधि दिलाएका हुन् । गत वर्ष विश्वकपको फाइनलमा पराजित भएको अर्जेन्टिना यसपटक कोपा अमेरिकाको फाइनलमा पनि पराजित भयो ।
