काठमाडौ, १ असार ।
महिला विश्वकप फुटबल प्रतियोगिता अन्तर्गतका पछिल्ला खेलहरुमा नर्वे र जमर्नी विजयी भएका छन् ।
गएराति सम्पन्न प्रतियोगितामा नर्वेले आइभरिकोष्टलाई ३–१ गोल अन्तरले पराजित गरेको हो । नर्वेका लागि हेवरवर्गले खेलको ६ र ६२ औं मिनेटमा गोल गरिन् ।
यस्तै खेलको ६७ औं मिनेटमा गुल्वर्डसनले थप एक गोल गरिन् । आइभरिकोष्टकी एङगेले ७१ औं मिनेटमा एकमात्र सान्त्वना गोल गरिन् ।
जितसँगै समुह बि मा रहेको नर्वे ३ खेलबाट ७ अंक जोड्दै अंक तालिकाको दोस्रो स्थानमा रहेको छ । तीनै खेलमा पराजित भएको आइभरीकोष्ट भने अंक बिहिन रहदै तालिकाको पुछारमा छ ।
यस्तै गएराती नै सम्पन्न खेलमा एसियाली राष्ट्र थाइल्याण्डलाई ४–० ले पराजित गदै जर्मनीले जीत हात पारेको छ । जर्मनीका लागि पिटरमानले ५६ र ५८ मिनेटमा गोल गरिन् ।
यस्तै लेउपोल्ज र डावरिजले थप एक एक गोल गर्दै जर्मनीलाई ४–० जीत दिलाइकी हुन् । तीनमध्ये २ खेलमा जित र १ मा बराबरी खेल्दै ७ अंक जोडेको जर्मनी शीर्ष स्थानमा छ भने थाइल्याण्ड ३ अंक सहित तेस्रो स्थानमा रहेको छ ।
