काठमाडौ, ३० जेठ ।
अखिल नेपाल फुटबल संघ (एन्फा) का कार्यबाहक अध्यक्ष ललितकृष्ण श्रेष्ठको निधन भएको छ ।
ललितपुर भैँसेपाटीस्थित नयाँ घरमा शुक्रबार मात्रै सरेका श्रेष्ठलाई करेन्ट लागेपछि उपचारका क्रममा अल्का अस्पतालमा निधन भएको हो।
व्यवस्थापिका संसद्को लेखा समितिले केही महिनाअघि एन्फामा भएको अनियमितताको छानविन गर्न गणेश थापालाई पद स्थगनको निर्देशन दिएपछि श्रेष्ठ एन्फाको कार्यबाहक अध्यक्ष बनेका थिए ।
त्यसअघि उनी एन्फाका वरिष्ठ उपाध्यक्ष तथा प्रवक्ता थिए। थ्री स्टार क्लबका समेत अध्यक्ष रहेका श्रेष्ठ पुराना फुटबल खेलाडी हुन् । लेखा समितिले दोषी ठहर गरे पनि थापाको मुद्दालाई अख्तियार दुरुपयोग अनुसन्धान आयोगले तामेलीमा राखेको थियो।
२०४३ सालदेखि थ्रीस्टारमा आवद्ध श्रेष्ठ तीन पटक यसका अध्यक्ष चुनिएका थिए। श्रेष्ठका पत्नी निलु श्रेष्ठ, एक छोरा र एक छोरी छन्।
श्रेष्ठको शव अहिले अल्का अस्पतालमा राखिएको छ। श्रद्धाञ्जलीका लागि उनको पार्थिव शरीर अहिले ९ बजेदेखि ११ बजेसम्म एन्फा कम्प्लेक्स सातदोबाटोमा राखिने भएको छ।
श्रेष्ठको निधनले नेपाली फुटबलमा अपुरणीय क्षति भएको थ्रीस्टारका महासचिव संजिव सिल्पकारले बताए ।
