गोरखा, १ वैशाख ।
उत्तरी गोरखाको काशीगाउँमा फैलिएको पखालाको प्रकोप नियन्त्रणमा आएको छ । काशीगाउँ–१ र २ का १० बालबालिकामा एक हप्ताअघि देखिएको पखाला नियन्त्रणमा आइसकेको जिल्ला जनस्वास्थ्य कार्यालय गोरखाका नानीबाबु दानीले जानकारी दिए ।
“साना बालबालिकामा पखालाको प्रकोप देखिएको थियो”–उहाँले भन्नुभयो–“प्राथमिक स्वास्थ्य केन्द्र आरुघाटका वरिष्ठ अहेव विजयकुमार श्रेष्ठको टोली औषधि लिएर काशीगाउँ पुगेर फर्किसकेको छ ।”
पखाला लागेर ग्रसित भएका यार्सा गाउँकी किसा घलेको ११ महिने छोरा अभिषेकको गत चैत २६ गते उपचारका क्रममा निधन भएको थियो । सुरुको चरणमा १० बालबालिकामा पखाला देखिएको थियो ।
“परिवारका सदस्यले हेलचेक्र्याइँ गर्दा एक बालकको मृत्यु भयो”–दानीले भन्नुभयो–“अहिले सबै स्वस्थ भइसकेका छन् ।”
पखालाको प्रकोप फैलिएको हल्ला आए पनि त्यस्तो नभएको उहाँले बताउनुभयो । सदरमुकामदेखि २० कोसको दूरीमा काशीगाउँ पर्छ ।
