काठमाडौँ, कात्तिक १४ — समाचार कक्षबाटै पत्रकार पक्राउ परेको घटनालगत्तै सत्तारूढ राष्ट्रिय स्वतन्त्र पार्टी (रास्वपा) ले आकस्मिक सचिवालय बैठक बोलाएको छ।
रास्वपा सभापति रवि लामिछानेले आज (शनिबार) बिहान ११ बजे बस्ने गरी सचिवालय बैठक आह्वान गरेका हुन्। समसामयिक विषयमा छलफल गर्नका लागि भन्दै शुक्रबार राति नै नेताहरूलाई बैठकबारे जानकारी गराइएको रास्वपा स्रोतले जनाएको छ।
सचिवालय बैठक अघि शुक्रबार साँझ सभापति लामिछानेले कानुनमन्त्री सोबिता गौतम तथा कानुनविद् रहेका पार्टीका सांसदहरूसँग परामर्श गरेका थिए।
शुक्रबार साँझ सादा पोसाकका प्रहरीले नेपालप्रेस डटकमका पत्रकार विश्वमणि सुवेदी, डीएनखबरका पत्रकार धीरज बस्नेत र मोटिभेट न्युजका पत्रकार शोभराज बराललाई उनीहरूकै समाचार कक्षबाट नियन्त्रणमा लिएका थिए। त्यस्तै, पत्रकार नवराज मैनालीलाई नियन्त्रणमा लिन प्रहरी नयाँ पत्रिकाको कार्यालयमै पुगेको थियो। मैनाली फेला नपरेपछि प्रहरीले सम्पादक खगेन्द्र पन्तसँग अढाई घण्टा सोधपुछ र छलफल गरेको थियो।
पत्रकार पक्राउको चौतर्फी विरोध र आलोचना भएपछि सरकार तथा नेतृत्वकर्ता दल रास्वपाले उक्त घटनाबारे आफूहरूलाई पूर्वजानकारी नभएको दाबी गर्दै वक्तव्य जारी गरिसकेका छन्।
